Elimizde Mámleketlik til sıpatında qaraqalpaq tiliniń gúllep-jasnawı, keń túrde rawajlanıwı, eń dáslep, búgingi kúnde bilimlendiriw shólkemleriniń barlıq buwınlarında xızmet etip atırǵan oqıtıwshılar, ustaz-muǵallimlerdiń pidayılıǵına baylanıslı. Demek, búgin mámleketimizde xızmet etip atırǵan hár qanday zıyalı insan – hám qaraqalpaq tiliniń tiykarǵı imla qaǵıydaların puqta ózlestirgen hám de sawatlı jazıw kónlikpesine iye bolǵan bolıwı lazım. Bul jaǵday onıń usı eldiń haqıyqıy watansúyiwshi puqarası sıpatında bolǵan húrmeti, usı elge, usı jurtqa bolǵan súyispenshiligi hám de óziniń shákirtlerine bolǵan joqarı úlgi iyesi ekenligin kórsetedi.
Ǵárezsizlikke dáslepki qádemler qoyılǵan dáwirlerden-aq, Húrmetli Prezidentimiz tárepinen Ózbek hám Qaraqalpaq tillerine mámleketlik til biyligin beriw máselesi kún tártibine qoyılıp, bul is ámelge asırılǵan edi.
Ózbek tiline 1989-jılı 21-oktyabrde, al, qaraqalpaq tiline 1989-jılı
1-dekabrde mámleketlik til biyligi berildi. Bul mámleketimiz, xalqımız turmısında umıtılmas, tariyxıy waqıyaǵa aylandı. Sonı atap ótiwimiz kerek, ózbek hám qaraqalpaq tillerine mámleketlik til biyliginiń beriliwi xalqımızdıń milliy ǵárezsizlikke erisiw jolındaǵı eń áhmiyetli qádemleriniń biri boldı. Ǵárezsizlik jıllarında mámleketimizde barlıq tarawlar sıyaqlı tilimiz rawajlanıwında da úlken ózgerisler boldı. Ózbek hám qaraqalpaq tilleriniń xalıq aralıq kólemde abıroyı bir qansha astı.
Usı múnásibet penen búgin Shımbay rayonı 8-sanlı Balalar muzıka kórkem-óner mektebinde 1-dekabr – «Qaraqalpaq tiline mámleketlik til biyligi berilgen kúni» bayramı múnásibeti menen “Mártebeń bálent bolsın, Ana tilim!” atamasında bayram keshesi ótkerildi.
Bayram ilajında rayon hákiminiń orınbasarı R.Jumamuratov shıǵıp sóylep, 1989-jılı 1-dekabrde Qaraqalpaqstan Respublikasınıń “Mámleketlik til haqqında”ǵı nızamınıń qabıl etiliwi ruwxıy dúnyamızdıń tiykarı esaplanǵan ana tilimiz – qaraqalpaq tiliniń mámleketlik til dárejesine kóteriliwine sharayat jaratılıp, onıń erkin rawajlanıwına, keń óris alıwına jol ashıp berilgenligin ayrıqsha atap ótip, bársheni bayram menen qutlıqladı.
Bunnan soń, usı tarawda miynet etip atırǵan pidayı ustazlar hám de bilim alıp atırǵan oqıwshılar shólkemlestiriwshiler tárepinen húrmet jarlıq hám sawǵalar menen sıylıqlandı. Sońınan mádeniyat xızmetkerleri tárepinen tayarlanǵan koncert baǵdarlaması qoyıp berildi.
