Усы жылдың 2-май күни Қарақалпақстан Республикасы Жоқарғы Кеңесиниң Баслығы Аманбай Орынбаев қытайлы бир қатар ири исбилермен инвесторлары «Fujian Qunfeng Investment Group» компаниясы ўәкили Линь Цяньтао ҳәм Линь Чжун, «BA ASSOCIATION» компаниясы бас директоры Б.Абдуллаевлар менен видео-конференц байланыс арқалы ушырасты.
Өткерилген ушырасыў даўамында «Тианженг хайтенг» кәрханасы тәрепинен Бозатаў, Кегейли ҳәм Тахтакөпир районларында 10 000 бас ири бас қарамалға мөлшерленген шарўашылық комплекси жойбарын әмелге асырыў бойынша да келисимге келинди.
Буннан тысқары, Синьцзян-Уйғур автоном провинциясы инвесторлары тәрепинен қосымша Шымбай районы аймағында жәми 50 мың бас ири бас қарамалларға мөлшерленген комплекслер шөлкемлестирилиўи анық белгиленип алынды. Бул жойбар бир неше басқышта әмелге асырылыўы нәзерде тутылған болып, биринши басқышта Шымбай районы «Тағ-жап» АПЖ аймағында жайласқан ески «ГИГАНТ» шарўа комплексин қайта тиклеў арқалы 25 мыӊ бас ири бас қарамал алып келип бағылыўын жолға қойыў белгиленген.
Атап өтиў орынлы, өткерилген ушырасыў көп тармақлы бирге ислесиўди жолға қойыў ҳәм кеңейтиўге бағдарланған болып, онда кадрларды қайта таярлаў бағдарламасын әмелге асырыў мақсетинде елимизде билим алып атырған студент-жаслар ушын туризм, логистика, қурылыс, архитектура ҳәм де аўыл хожалығы жөнелислеринде Қытайдың Сичуань провинциясында жайласқан университетлерине Қытай грантлары ажыратылыўын тәмийинлеў айрықша тилге алынды.
Қытайдың жергиликли тур-агентлик жөнелислерине Қарақалпақстан Республикасы бойлап саяхат етиў бойынша жөнелис қосылыўы бойынша да өз-ара келисилди.
