Жоқарғы Кеңес Баслығы туризм, мәденият, мәдений мийрас, миллий кинемотография тараўлары бойынша әмелге асырылып атырған жумысларға арналған видеоселектор мәжилисин өткерди

Қарақалпақстан Республикасы Жоқарғы Кеңесиниң Баслығы Аманбай Орынбаев туризм, мәденият, мәдений мийрас, миллий кинемотографияны раўажландырыў ҳәмде бул тараўларда жол қойылып атырған кемшиликлер ҳаққындағы мәселелерге арналған видеоселектор мәжилисин өткерди. Онда тийисли министрлик, басқарма ҳәм басқарыў уйымлары, жергиликли ҳәкимликлер қатнасты.

Өткерилген мәжилисте Жоқарғы Кеңес Баслығы тәрепинен тараўларда бүгинги күнде әмелге асырылып атырған жумыслар сынға алынды.

Сондай-ақ, Жоқарғы Кеңес Баслығы өз сөзинде “Жаслар, қаламызға келиўши мийманлар ҳәм халқымыз мәдений дем алыў ушын қай жерге барады? Кеўил ашар, дем алыў майданларымыз барма өзи?”- деген оғада әҳмийетли мәселени қойды ҳәм бул бойынша жуўапкерлерге кеўил ашар майданлар, кинотеатрлар, қыябан ҳәм жаслар сейил етиўи ушын бағ шөлкемлестириў илажларын көриў бойынша тапсырма берди.

Атап өтиў керек, ҳүрметли Президентимиз тәрепинен ишки ҳәм сыртқы туризмдеги жағдай, мәўсимге таярлық көриў ҳәм бул тараўдағы машқалаларды сапластырыў бойынша бир қатар тапсырмалар белгилеп берилген. Усыған қарамай, жуўапкерлер тәрепинен бүгинги күнде бул ўазыйпаларды орынлаўда артта қалыўшылық жағдайларына жол қойылмақта.

Өткерилген мәжилисте өз жумысын орынлаўда қәте-кемшиликлерге жол қойғаны ҳәм белгиленген тапсырмаларды орынлаўда немқурайдылық пенен қарағаны ушын Министрлер Кеңесиниң Туризм, мәденият ҳәм мәдений мийрас секретарияты баслығына, Туризм ҳәм мәдений мийрас министри орынбасарына интизамый жаза шарасы қолланылды.