Қарақалпақстан Республикасы Жоқарғы Кеңесиниң Баслығы Аманбай Орынбаев республикамыз халқының күнделикли турмысында ушырасып атырған машқалаларды үйрениў ҳәм оларға шешим табыў мақсетинде орынларда жеке қабыллаўларын өткерип келмекте. Соның менен бирге, алыс аймақ турғынларының да тилек-өтинишлерин тыңлаў, турмыс абаданлығын тәмийинлеў ҳәм олардың турмыслық мәселелерин шешиў бойынша да ең шетки аймақларға барып, турғынлар менен ушырасып атыр.
Бүгин Қарақалпақстан Республикасы Жоқарғы Кеңесиниң Баслығы республикамыздың ең шетки аймағы болған Қарақалпақстан посёлка пуқаралар жыйынына қараслы, посёлка орайынан дерлик 60 км узақлықта жайласқан Бостан халық жасаў пункти турғынлары менен ушырасты.
Онда пуқаралар тәрепинен бир қанша мәселелер көтерилип, мүрәжатлар билдирилди. Билдирилген мүрәжатларда тийкарынан студент жаслардың контракт пулларын төлеп бериў, мүддетли әскерий хызмет төлемин әмелге асырыў, Ташкент қаласында емлениў ушын жоллама алыў сыяқлы машқалалар орын алған болып, бул мүрәжатлар Жоқарғы Кеңес Баслығы тәрепинен сол орынның өзинде шешип берилди.
Сондай-ақ, көп балалы шаңарақларға кир жуўыў машинасы, газ плита ҳәм басқа да тутыныў буйымлары саўға етилди. Аймақ турғынларының биргеликте билдирген мүрәжаты тийкарында шаңарақлар Қоңырат районы орайы, Қарақалпақстан ҳәм Жаслық посёлкаларына көширип өткерилетуғын болды.
Халқымыздың разылығын тәмийинлеў, олардың турмысында ушырасып атырған машқалаларды шешиў жолындағы әмелий жумыслар даўам етпекте.
