Қарақалпақстан Республикасы Жоқарғы Кеңесиниң Баслығы бир қатар тараў пидайыларын сыйлықлады
Жақын күнлерде Өзбек миллий академиялық драма театры республикамыз аймағында гастроль сапарында болып турыпты. Сапар даўамында Бердақ атындағы академиялық музикалы театры жәмәәти менен биргеликте әжайып саҳналық дөретпелерди театр ықласбентлери нәзерине усынып атырған болып, бүгин усындай әжайып дөретпелердиң бири болған «Тирсеклер» комедиясы Бердақ атындағы академиялық музикалы театры саҳнасында тамашагөйлер нәзерине усынылды.
Онда Қарақалпақстан Республикасы Жоқарғы Кеңесиниң Баслығы Аманбай Орынбаев қатнасты.
Сондай-ақ, Қарақалпақстан Республикасы Министрлер Кеңесиниң Баслығы Қ.Сариев, Қарақалпақстан Республикасы Жоқарғы Кеңеси Баслығының орынбасары Р.Сапарбаев қатнасып, спектакльди тамашалады.
Айтып өтиў орынлы, өзбек ҳәм қарақалпақ миллий театр өнери шеберлери тәрепинен өткерилип атырған бул илажлар көп миллетли халқымызға тән болған халықлар дослығының және бир айқын көриниси болып, туўысқанлық, татыўлықты еледе беккемлеўге хызмет етеди ҳәм театр ықласбентлери нәзерине сүйип тамаша ететуғын сахналық дөретпелерди усынады.
Спектакль соңында театр сахнасындағы көп жыллық мийнетлери ҳәм көркем өнеримизди раўажландырыўға қосып атырған үлеслери ушын бир қатар тараў пидайылары сыйлықланды.
Қарақалпақстан Республикасы Жоқарғы Кеңесиниң Мәлимлеме хызмети
